Psa 31 | YON | STEP | Yook ambo bi ye karub yeman. Dewid ye yook. O Yariman , ebbed kukbimaabbon aombed dobirimain, korondaawe ne yaa karak kawaib. Eb yorokmo kerekmen yaambed ne nen burudande angka kowe.

Psalms 31

Yook 31

Yook ambo bi ye karub yeman. Dewid ye yook.

1 OYariman, ebbed kukbimaabbon aombed dobirimain,
korondaawe ne yaa karak kawaib.
Eb yorokmo kerekmen yaambed ne nen burudande angka kowe.
2 Ne yaa eb kerendem kowe wengamberewe.
Kirod mene ne nen angka kowe.
Ne nen bikneneb aromne angkumoni ye karub kere.
Ne nen dorondandi ye karub kere.
3 Eb kuu ne aromkonombon, eb kuu ne aromne angkumonimbon kowe,
ewaningko kankooni dowad ne nen kinban weneneb eb kiwaan ari kowe.
4 Dabab kawi yeman warab areb ongmiwen kuyaa ne nen angka kowe,
amborom kuu eb kuu ne yone biknimbon.
5 Eb dingki ari kuu ne kingkin kowaan.
OYariman, anam anam ye God, ne bidde.
6 Dudi god kuu karub ma awandindeban, kwane yi kuruwak yaa bumangkimaibdan yaa kuu kongendimain,
kwaneYariman yaa angkumone doriin.
7 Eb womoniyiibban ye mimyob dowaken yaa kuu dowaken kereni kubaniin,
amborom kuu durud yewed kandaan kuu wedmeneb,
dabab kande miin kubiyiibban keraan kuu ebkaadkerewen kowe.
8 Ebbed ne nende bondan yi dingki ari kowindo,
ma, ebbed ne nende dewenebimbon aom kowewen.
9 OYariman, ne niindem aom miin kubiyiibban keraan kowe,
ne yaa mimyob keewe.
Kedi, ne indob kuu mimyob kowi ye amengbed wuud keroon,
kwane ne idiib kingkiniib kuu mimyob wandoon.
10 Ne wad dobaraan kuu miin kubiyiibbaniib kumbedmo,
kwane ne weeb korem kuu wareki kamembirimain.
Dabab ne yaa meneboon kowe naromkono dowan keroon,
kwane ne kono kuu wuud kere wonoon.
11 Ne kuu bondan yemooniib kowe nimakarub kuu ne dowad miin arewa ande ambodiibban keruwiwen,
ne dia doriibdan kuu kuye inamen burudande ne yaa odkeneb anam keriwen.
Nangkodmia kuu uni darewoob keruwiwen,
kwane kane kane kiwaan arimbed wedmewimaib kuu kirokmone winimaib.
12 Ne kuu yimbed bobnoon ande nonondanduwimaib,
kwane ne kuu nongdomatom areb keraan.
13 Wengambaraan kuu ne dowad nimakarub yemoon koraaweng weng dakmimaib,
“Ye kuu uniwon karakwon kumbed kanawanewandoon.” andimaib.
Ne bondan kuu ne dowad wunonwanon kamiib,
kwane yi kuu ne dowad nuubnaan kamiib kii.
14 Kumban, oYariman, ne kuu eb yaambed yone doriin,
kwane “Eb kuu ne God.” ande yedmimain.
15 Ne dobiri yaron kuu ebbed kinewen,
kowe ebbed ne bondan yaambed ne nen burudande angka kowe,
ne nenbandande kerewenmo yarimaibdan kui.
16 Eb nambiri kuu eb deme karub ne yaa yure.
Eb womoniyiibban ye mimyob dowaken yaambed ne nen burudande angka kowe.
17 OYariman, eb yaa baandimain kowe,
korondaawe ne yaa karak kawaib.
Kumban arewa kamimaibdan kuu karak kandime,
kwane bobkonombon yiri iwarimo dangime.
18 Yi dudanabi weng kuu kebende,
amborom kuu yimbed kerengkan wengiib nubkob andi ye wengiib
yorokmodan ben kubune manmo kere dakmimaib kowe.
19 Eb amun amun kami kuu darewoob.
Kuye inamen kuu kane kane eb yaa une bumangkimaib yi dowad kan kowimaab.
Kuye inamen kuu ebbed nimakarub yi indob arimbed
kane kane ebbed kukbimaabbon aombed doriibdan yi dowad kan kowimaab.
20 Ebbed kukbimaabbon aombed doriibdan kuu
nimakarub yi wunonwanon kamiib yaambed ben eb kerebiri ari nongkobe oonimaab.
Ebbed kukbimaabbon aombed doriibdan kuu
kadwoni weng yaambed ben eb oonimbon aom nongkobe oonimaab.
21 Yariman yaningko kankoonem,
amborom kuu ne kuu bondanbed kanawanewandiwen ye siti aom dobaraan kumbed
yembed ye womoniyiibban ye mimyob dowaken korokbewoone kukuu yeka mamaa andaan.
22 Ne unimbon aombed yedmaan,
“Eb indob arimbed kuu ne kuu kan angka karewen kii.” andaan.
Kuned eb yaa baandaan kuu wengamberewen,
eb yaa awawe ande baandaan kui.
23 Yembed yorokmo kerundoondan, yiib korem kuuYariman yaa mimyob dowaken keenime!
Korondiyiibban anam ande doriibdan kuuYarimanbed dorondare awandimaan,
kumban kerengkan kamiibdan kuu yembed kumundinmo ine dabab kondimaan.
24 Kane kaneYariman ye dowad yembed kwananeen ande meedmiibdan,
yiib korem kuu aromkono kerenib arudkono awinime.